Во овој текст фокусот го ставаме на имотот кој повеќе не се користи, а кој има нето книговодствена вредност, и ќе ги објасниме најважните услови за признавање на расходите во даночниот биланс за 2025 година, поврзани со неговото расходување.
Причината зошто го пишуваме токму овој текст е рокот до 31 јануари 2026 година за правните лица кои располагаат со погоренаведениот имот и сакаат да го искористат ова право и да достават соодветна документација до УЈП.
Имот кој е трајно надвор од употреба
За имот кој е трајно повлечен од употреба се смета:
- Средства, кои, со одлука или друг акт на органот на управување на даночниот обврзник, се ставени надвор од употреба поради физичка истрошеност или техничка застареност;
- средства кои даночниот обврзник не ги користел подолго од една година во континуитет, а нивното повлекување од употреба не е последица на поправка или надградба;
- средства чија набавка е откажана во фазата на набавување или за кои три последователни години не се вложени средства за завршување на таа набавка;
- како и средства кои даночниот обврзник ги користел со помалку од 30% од својот програмски капацитет во последните пет години.
Која документација треба да се достави за признавање на расходите
Притоа, обврзникот треба по електронски пат да достави до УЈП:
- Барање за признавање на расходи во даночниот биланс за данок на добивка (образец ДД-БС);
- Барање за признавање на расходи од работењето на даночниот обврзник во даночниот биланс за данок на доход (образец ДЛД-БС).
Која дополнителна документација треба да се достави? Даночниот обврзник, исто така, доставува и список на имот кој повеќе не се користи, акт со кој се уредува начинот на пресметка на амортизацијата, одлука за усвојување на извештајот за попис и евиденција на утврдените разлики, како и изјава дека средствата повеќе не можат да се користат, во која мора да биде наведен поконкретен причински основ. Доколку обврзникот не достави целосна документација, нема да може да го оствари ова право.
И за крај, да го заклучиме најважното – расходите не се признаваат во даночниот биланс произволно. За да се оствари правото на признавање на расходи во даночниот биланс за 2025 година, потребно е да се исполнат законски пропишаните услови. Неопходно е да се подготви и приложи целосна документација и истата, во утврдениот рок, да се достави до надлежниот орган.
Доколку имате дополнителни прашања или ви е потребна помош, слободно обратете ни се на info.sk@unija.com. Сите наши новости од областа на даноците, како и стручни текстови, можете да ги следите на нашата страница за вести.
