Од 01.01.2023 година започна примената на новиот Закон за платежни услуги и платни системи кој предвидува неколку одредби кои ги избравме да ги истакнеме и кои треба да се имаат во предвид во тековното работење. Исто така, подолу во текстот Ви ги претставуваме и измените на Законот за спречување на перење пари и финансирање на тероризам.
Закон за платежни услуги и платни системи
Согласно овој Закон:
- Плаќањето на производи и услуги во готово од страна на правни лица не може поединечно да биде повеќе од 6.000 денари, и не може да надмине вкупен износ од 60.000 денари во текот на календарскиот месец.
- Се воведува обврска за осигурување на благајничкиот максимум за износ над 20.000 денари
- Се предвидуваат глоби за непочитување на обврската за осигурување на готовината што се чува во благајна и за ограниченото плаќање во готово.
- Се одложува забраната за плаќање со пресметка за правни лица кои имаат блокирана платежна сметка до 01.01.2024 година.
Закон за спречување на перење пари и финансирање на теороризам
Согласно измените на овој Закон:
- Забрането е плаќање со готовина на стоки и услуги во износ од 3.000 евра или повеќе во денарска противвредност во вид на една или повеќе очигледно поврзани трансакции, што не е извршено преку банка, штедилница или преку сметка во друга институција која дава платежни услуги, доколку со друг закон не е поинаку уредено
- За непочитување на горенаведената одредба предвидени се глоби зависно од големината на правното лице;
- Се предвидува етапно намалување на прагот за плаќање во готовина, и тоа од 01.01.2024 година забраната ќе се однесува на готовински плаќања над 2.000 евра, а од 01.01.2025 година забраната ќе се однесува на готовински плаќања над 1.000 евра.
