Како што најавивме во претходните известувања (прочитајте тука), од 01.01.2024 година задолжително е назначување на даночен застапник за ДДВ на странски лица кои вршат промет или услуги на територија на Република Северна Македонија.
Имено, поради регистрација за цели на ДДВ и назначување на даночен застапник, странското правно лице мора да се регистрира за целите на ДДВ со поднесување на Пријава за регистрација „образец УЈП-РДО„ , и со доставување на соодветни прилози во истиот:
- договор за назначување на даночен застапник;
- потврда за резидентност од земјата во која има седиште или подружница;
- полномошно издадено од странското лице, преведено на македонски јазик;
- копија од лична карта или тековна состојба од ЦРСМ за лицето назначено како даночен застапник на територија на РСМ;
- доказ дека за назначениот даночен застапник не е започната стечајна или ликвидациона постапка ако е правно лице или
- доказ дека назначениот даночен застапник не е правосилно осуден за кривично дело ако е физичко лице
Исто така треба да се поднесе и Пријава за регистрација за данокот на додадена вредност на странско лице преку даночен застапник „образец ДДВ-01/СЛ-ДЗ”.
Обврските на даночниот застапник се следните:
- Да го пресметува данокот на додадена вредност врз основа на добиените пресметки од странското лице;
- Да поднесува Пријава за данокот на додадена вредност (образец ДДВ-04) во име на странското лице од кое е назначен како даночен застапник по истек на секое тримесечје;
- Да го плаќа данокот и пресметаната камата во случај кога странското лице не ја извршило уплатата во законски пропишаниот рок и
- Да води евиденции за извршениот оданочив промет од страна на странското лице.
Во Службен весник на Република Северна Македонија број 286 од 29.12.2023 година можете да ги погледнете:
- Правилникот за начинот на пријавување и регистрација на странско лице
- Правилникот за начинот на водење на регистарот на даночни застапници
- Формата и содржината на регистарот на даночни застапници
- Формата и содржината на пријавата за регистрација за целите на данокот на додадена вредност, како и потребната документација за и назначување даночен застапник.
Истиот може да го најдете на web страната на УЈП, односно на следниот линк: http://www.ujp.gov.mk/mk/regulativa/opis/435.
За подетални информации и консултации можете да не контактирате на нашиот е-маил: consultingmk@unija.com.
